FÂ O DISFÂ, SI O NO AL SDRUMÂ IL VECJO OSPEDÂL DI VIE VITTORIO VENETO

di GUIDO GERMANO PETTARIN

Al è un proverbi antîc che al continue a jessi confermât e al reste fuart ancjemò vuê.

La cuistion, dut câs, e je cemût che si dopre, parcè che “no fâ” al vûl dî ancje distruzi e dismenteâ, come che “fâ” al vûl dî ancje costruî e disvilupâ.

O disfin il passât e o costruìn il doman. O tirin ju un palaç vecjo e metin al so puest un gnûf. Abandonìn i vecjos progjets di vite e, metint gnûfs obietîfs, o cirìn di cambiâ lis nestris vitis.

Dut vêr. Ma il pinsîr tal cjâf de int, la manifestazion plui a man dal “fâ e disfâ” e je di sigûr chê che o viodin di prime man: la asfaltadure di une strade, il meti a puest un marcjepît, il rinovament di un edifici, il tirâ ju une barache par tirà su un gnûf edifici.

A Gurize, o pluitost, a Go!2025 Gnove Gurize e Gurize Capitâl Europeane da Culture, il teme dal “fâ e disfâ” tai ultins mês al è leât al vecjo ospedâl te vie Vittorio Veneto.
Il sdrumament decidût e programat al veve l’obietîf di fa nassi un gnûf cjamp educatîf che al varès di puartâ achì e meti dongje tantis scuelis che a si cjatin cumò ator pe citât. A son tancj argoments a pro di demolî e tornâ a fa su o di lassâlu e metilu a puest.

I problemis a van dai coscj di tirâ vie e smaltî i rudinaçs, ai timps pai lavôrs, al incuinament fat des machinis che a varessin di jessi dopradis pai lavôrs, ae pussibilitât di doprâ i edificis par Go!2025 cuant ca e finis, al valôr di un gnûf complès scuelâr cetant moderni intun puest tacat dal confin di ‘Visavi’ dal straordenari parc di Basaglia. E daspò, si fevele di cemût spostâ i students ator de citat e cemût ancje doprâ lis scuelis che a vignaran lassadis vuedis. Di che altre bande sui vantaç in sigurece che a darès un centri ugnul, ma ancje ce fa se no dal vecjo ospedâl che al restarès culì cence un doman.
Cheste e je une liste lungje di vantaçs e disvantaçs, ma a podaressin zontâsi ancjemò altris.
Jo mi permet di pontâ il dêt su une robe une vore impuartante, ma che forsit e je stade dismenteade, soredut di chei che a sburtin par sdrumâ il vecjo ospedâl: la memorie de identitât.
Cuant che si podeve ancjemò nassi a Gurize, in vie Vittorio Veneto a son jessûts gjenerazions di gurizans e dai comuns ator ator. Come ancje, simpri ta chest ospedâl altris gjenerazions a an sierât i voi par simpri, cun dongje parincj e amis.

La memorie di une comunitât e je la so identitât. Cence dubi! Come cence dubi al è il fa che lassâ in pîts l’ospedâl al garantis un puest pai ricuarts di tancj.
La decision ae fin scugne fondâsi dome su numars economics?
No sarès la prime volte te storie de citat e il vecjo ospedâl Fatebenefratelli te vie Diaz al è un bon esempli. Dismetût il so lavôr di curâ la int, nol è stât sdrumat ma tornat a meti a puest e doprât par altris robis, impuartantis compagn pe nestre comunitât.

Su vie Vittorio Veneto la discussion e varès di jessi compagne, ven a stai no se butâlu ju o no, ma cemût dâi une gnove vite, cussì di lassâ il puest de memorie di ce cal è stât.
O soi sigûr che il teme al è une vore delicât e ingropât, ma al è cumò il moment di frontâlu, no cuant che lis ruspis a varan tacat a fa il lôr lavôr. Jo o soi pront ma soredut o soi convint che la decision finâl e à di sedi lassade al popul di Gurize. E soredut in timps come chescj che la int e à pocje passion di la a votâ.

La mê propueste e je di fa un referendum comunâl pai citadins di Gurize su la cuistion de demolizion o rinovazion dal vecjo ospedâl te Vie Vittorio Veneto. Organizâ un referendum comunâl e domandâ la opinion dai eletôrs: sì o no al sdrumament?
Une domande sempliçe e drete, cence masse sgherlifs burocratics: sì o no.

Al sarès un at di granda responsabilitât de bande da aministrazion comunâl e di grant rispiet pe int, pe memorie e pal doman.
Soredut intune citât come Gurize che e ten cjare la memorie, par masse timp dividude, de sô storie. Di dute la sô storie.

Articolo in lingua friulana.