COVENTIAL ANCJEMÒ JESSI FURLAN?

di GUIDO GERMANO PETTARIN

Gno nono al jere nassût a Pole tal 1899, intune famee di Cormons che e jere lade prime a Viene. Inte sô vite no cussì lungje – al è muart tal 1971 – al jere stât citadin dal Imperi Asburgjic, dal Ream de Italie, dal Tierç Reich di Gjermanie, de Jugoslavie, dai teritoris angloamericans liberâts e daspò, infin, de Republiche taliane. Denant a esperiencis come chestis, o vin di meti in dubi la nature e la entitât dai colôrs che la storie e la gjeopolitiche a imponin ae umanitât e ce significât che al à vuê, intun mont segnât di vueris imberdeadis e dispès di no capî, tal pretindi la proprie identitât e, tal stes timp, tal volê deventâ citadins dal Mont.

No si pues dismenteâ che prin da Prime vuere mondiâl si podeve lâ ator in maniere libare di Parîs a Mosche cence ostacui dai confins e dai documents. Chest al è impussibil vuê, a dispiet dai 80 agns plui o mancul che a son passâts de fin de Seconde vuere mondiâl. Otante agns di ‘pâs’ pe Europe, ma di sigûr no pal rest dal Mont. Intune situazion cussì fraidide, aial ancjemò sens sintîsi toc di une minorance? Di une comunitât culturâl e umane? E soredut, cemût confermâ cheste apartignince?

Mi soi domandât di un pieç di timp se al veve ancjemò sens par me pretindi di jessi furlan e testemoneâlu in ducj i moments. Aial sens jessi furlan tal 2026? Une domande grivie, ma che e pretint une rispueste sclete: sì o no. Tertium non datur.

O ai simpri crodût che par risolvi une ecuazion matematiche complicade, al è impuartant, prin di dut, savê cemût zontâ doi plui doi. Compagn, prin di dî di jessi europeans e citadins dal Mont, al è, par me, essenziâl jessi cussients di ce che si è e de proprie storie e di chê dal nestri popul.

Tal gno câs, se no fos braurôs di jessi furlan, cemût podaressio dî di jessi talian, european e citadin dal Mont? Tertium non datur.

O soi furlan, o feveli furlan, o scrîf furlan, o testemoni il FRIÛL e la sô storie, o confermi i siei valôrs e la sô identitât, simpri, ancje denant dai compuartaments cuintri la storie des altis autoritâts che a disin che “o fevelìn talian culì”. Duncje, ae domande che mi soi fat prime – se al à ancjemò sens afermâ la proprie essence, la proprie culture e lenghe mari, la proprie identitât Furlane – la rispueste e je SÌ, al à sens.

Ma nol è un sens apoditic, assolutist, alergjic aes motivazions di bon sintiment; al contrari, al è un sens relatîf che al cjape il so parcè dome se, tal stes moment de proprie identitât, ancje lis identitâts di altris a son rispietadis e difindudis. No mi spietarès, come che o fasìn in dutis lis oportunitâts, di jessi rispietât come furlan se no rispietàs altris identitâts. Ducj diviers di me e ducj a difindi che nissun al è plui compagn di un altri.

Tomizza, l’om iluminât che al jere, al à scrit che al jere stât talian a Belgrât, istrian talian a Zagabrie, cravuat talian a Lubiane, slâf istrian a Triest e un talian di Triest in Italie. Par nô furlans, tal nestri piçul, al è impuartant jessi furlans pardut tal Mont, testemonis in ducj i Paîs dulà che o sin lâts simpri e pardut simbui de civiltât, dal rispiet, dal lavôr, de umiltât e de dedicazion. Furlans, ricuardìn a ducj che o sin furlans, fasintsi cognossi, fevelìn la nestre lenghe, e sberghelìn i principis che nus àn insegnât lis nestris maris, e stin pronts a difindi dutis lis culturis, lis minorancis e chei altris popui. Un modon par om e ducj o sarìn a plomp. Mandi.

Articolo in lingua friulana.